‘Vanaf de kansel’

op feb 10, 18 in ‘Nao de Hòmmis’ met Reacties uitgeschakeld voor ‘Vanaf de kansel’

Goede tradities zijn er om in ere te houden. En tot die goede tradities rekenen we ook dat de vaste columnisten van ‘de Zijbeuk’op Carnavalszaterdag plaats maken voor de nieuwe heerser over het ‘Kieveloeëteriek’. De vaste columnisten Roger, Huub en Mat doen hun werk vanuit een bescheiden plek in de zijbeuk. Voor een prins een volstrekt onwaardige plek. Voor onze prins rollen we ook dit jaar weer de rood-geel-groene loper uit richting de kansel. Vanaf deze prinswaardige plek richt dit jaar Zijne Doorluchtige Hoogheid Marcel d’n Uurste, zich tot zijn onderdanen.

Beste Kieveloeëters
Lieve Kieveloeëterinnekens

Prins wéére van de Kieveloeët. De méste kanne d’r allieën mèr van droeëme. Vur méj is dien droeëm óp 7 jannewarrie wérrekelekhéjd gewórre. En vanaf dè mómènt lééve min vriendin Susan en ik in ’ne roeëj-géél-gruune ‘kievel-bubbel’. We hébbe de afgeloeëpe wééke al maage geniete van hél veul sjòn mómènte en dan moete ’t èchte fést nòg beginne. Nie te geluuëve! Vur dè èchte fést mag ik zòtterdigaovend béj ‘t begin van de Vastelaovesmis in ónze ‘kattedraal van de Pieël’ d’n aftrap doe. ‘n Mis wòrrin we ók di jaor wér probere de èrnst van alledag te mènge mi de vastelaoveslòl die d’rèn zit te kómme. ‘Saame ónderweeges’, is de tietel van die Mis en dizze tietel paast as ‘n ‘prinsejèske’ ók béj ’t fést, dè we mi die Mis óp gang trèkke en ènslutjend mi de ‘sluttelövverdracht’ witjer óp stoeëm brénge. En vanaf d’n óptòcht zóndigmiddig zin we dan saame dréj daag ónderweeges in ‘t Kieveloeëteriek. Wa ‘n gewèldig vurutjzeecht!

Mèr ‘t is nie allieën ‘t groeëte spèktakel, dè die Méélse vastelaovend makt tòt wa tjie is: ‘n fést vur de ganse geménjsjap. Éévegoe huure dòrbéj al die kléénj belééfenisse ónderweeges, die ieder van óns éllek jaor wér meemakt. Óntmoetinge mi bekéénde en minder bekéénde, mesjien zèllefs wal tótaal ónbekéénde. De sjòn verhaale die we mekaar dan vertélle en saame dè pilske drinke óp d’n hoek van ‘t buffet of mesjien wel saame in pólónééze dur ‘t dèùrep loeëpe. Ók dè is vastelaovend in Méél!

Mèr um óns allemòl zònne sjònne, ónbezèùregde vastelaovend te laote viere, moet d’r aachter de sjèèreme dur ‘ne groeëte groep mènse kééjhard gewérrekt wéére. Ók dè héb ik de afgeloeëpe wééke maage ervaare en ik dörref te zégge, dè ik dòr as wèèrèkveurberéjder in de bòw wal énnige kiek óp héb. Goej wèèrek hi nie allieën titj nöddig, mèr óp de uurste plats ‘n goej veurberéjding. En die kunst verstòn ze béj de Kieveloeët as de beeste. En dè leeste gélt ók vur al die mènse, die óp de aachtergrónd aktief zin béj de Véngneuze en de Kéjsjeute.

Èn alle veurwaarde um d’r ók di jaor wér ‘n gewèldig sjòn fést vur iederieën van te kanne maake is vóldao. En of ‘t dè ók ècht gé wéére, li èn óns. Dè hébbe wéj saame in de haand. Ik twiefel d’r gén momènt èn of dè gé óns lukke. Dè waar de afgeloeëpe 66 jaor ‘t geval en zal di jaor nie anders zin. We gòn mi zin allen wér geniete van ónvervalste, Méélse vastelaovesdaag.
Dan kan ik óp Aswoenzig béj óns mam en pap boove ‘ne tèlder gehaktbèllekes in tomatesòws utj de grónd van min hart zégge:“Wa waar ‘t tòch sjòn, um ‘ne kieër in min lééve prins van de Kieveloeët te maage zin.”

Susan en ik stòn te trappele um de kievel èn ‘t ròlle te brénge en al die daag minne liefspreuk dur ‘t Kieveloeëteriek rónd te ‘toetere’:

Goe veurberéjd baowe,
èn ‘ne vastelaovend um van te haawe

Prins Marcel

Prins Marcel I en zin Susan

 

Pin It

Related Posts

Comments are closed.

« »

Scroll to top