Het is weer zover. De prins neemt tot Aswoensdag de macht over in ons ‘Kieveloeëteriek’ en dat heeft ook voor de parochieweblog zo haar consequenties. De vaste columnisten van de ‘zijbeuk’- Roger en Mat – maken plaats voor de prins, voor Luc I. Natuurlijk doet hij dat niet vanuit de bescheiden, ietwat donkere zijbeuk, maar in het volle licht van de schijnwerpers: vanaf de kansel van onze kathedraal in de Peel. Uw aandacht voor Zijne Doorluchtige hoogheid Luc d’n Uurste!
Beste Kieveloeëters
Lieve Kieveloeëterinnekens
Ik hép t’r jòrre van gedrömd: éns Prins te mage wéére van de Kieveloeët. En as ge langsaam mèr zeker gòt dinke dè ’t allemòl éjdele hoop is, wért óp zóndig 6 jannewarrie die droeëm tòch nog waor. Vur Han en méj ieën van de sjònste mómènte utj óns lééve. En dòrnao véélt òw dan ók nòg de ieër te beurt de andere nééj heersers in ‘t Kieveloeëteriek te mage installere. Öp 11 jannewarrie Prinses Ilse en Prins Maurits van de Véngneuze en óp 10 fibberwarrie Prinses Kimberly en Vorst Jens van de Kéjsjeut. Ópnééj mómènte wòrvan ik mi vólle teuge genóte hép. Ik twiefel d’r gén mómènt èn dè ‘t ’n fést gé wéére um same mi dees jeugdige kòllegas veuróp te gao in ’t Méélse vastelaovesspèktakel. Wéj stòn te trappele um ’t spel óppe wage te brénge en d’r Dréj Ónvergéételeke Dólle Dage van te make.
Féjn dè ik min ‘Vastelaovesgeluk’ ók ‘vanaf de kansel’ mi òllie mag délle. Want lòt óns érlek zin: Vastelaovend kanne ge allieën same viere en ’t èchte vastelaovesgeluk besté allieën as ge dè same mi andere kaant délle. En as prins natuurlek ’t liefst mi zò veul meugelek dörrepsgenote: awd en jóngk, riek en èèrem, man en vraow, wit of getint en alle gradasies die ge dòrtussenin nog kaant bedinke.
De uurste plèk wòr we èlkaar kanne óntmoete duu zich vanaovend al veur as um zeuve uur de tradiesjonele Vastelaovesmis van start gé in ónze kattedraal van de Pieël. Allieën al de binnekómst van de Kéjsjeut, de Véngneuze en de Kieveloeët, veuraf gegao dur de Heimatkepèèl is ’n fést vur oeëge en òrre. Keplaon Roger en wéj zòn ’t gewèldig vinge as vanaovend de kéérek harstikke vól zit. De Mis is di jaor ópgebaowd rónd ’t teema ‘Éllef pózietief’. Gén inkel getal is zò mi de vastelaoves wérreld verbónge as die éllef: van Den Bosch tot Maastricht; van Keule tot Mainz. En dè gèlt dan natuurlek ók vur ’t krusjpunt in dè gebied: Méél èn de rand van de Pieël, wòr mi dees daag ’t vastelaovesbloe dur ónze adere strömt. Önze bloedgroep is van ’t tiepe ‘éllef pózietief’ en dè zal in de vastelaovesmis vólóp gòn blieke. Dè betieëkent övveriges nie dè t’r in dees Mis gén plats is vur de seriejeuze zake wòrmi we in ’t lééve te make hébbe. Óngetwiefeld gé ’t ók di jaor wir ‘ne goeje miks wéére mi ónvervalste Mééls Vastelaoveshumor.
En nao de Mis ròlle we de wèèrem roeëj-géél-gruun Vastelaovesdeke övver óns dèùrep utj, um ze pas dinsdigaovend béj ’t Kievelmènneke wér óp te bèèrege. Vur iederieën is t’r ’n plèkse ónder die deke, óp ieder mómènt dè héj òf zéj d`r zin in hi. Want in óns Kieveloeëteriek drèèjt ’t déés daag mèr um én ding:
VASTELAOVEND SAAME
Prins Luc I van de Kieveloeët
